The key to wealth is not about how much money you make, it’s about how much money you spend. - Ted Seides
Ken no lo kier mas placa? Mas placa kiermen mas posibilidad pa haci of cumpra e cosnan cu bo kier. Bo lo pensa tambe cu mas placa ta nifica cu bo finansas personal ta mas saludabel, pero esaki no semper ta e caso.
Mas placa por nifica mas gasto?
Ora bo cuminsa gana mas placa y bo entradanan subi, bo por confronta bo mes cu un fenomeno yama 'Lifestyle Creep'. E fenomeno aki por percura cu e placa extra cu bo ta ricibi, no ta yuda mehora bo finansas personal pero ta wordo uza pa cubri gastonan nobo.
Pa splica bo dicon, laga nos mira kico 'Lifestyle Creep' ta.
Kico 'Lifestyle Creep' Ta?
Bo por bisa cu lifestyle creep ta un problema di luho. E momento cu bo cuminsa gana mas placa, bo 'discretionary income' of simplemente bisa, e cantidad di placa 'extra' cu bo tin tur luna, ta subi. Na cuminsamento bo gastonan lo keda mescos, pero cu tempo, e entradanan extra por hustifica un lifestyle mas 'luhoso'. Esaki por trece cu ne su gastonan extra, sin cu bo a ripara y pa e motibo cu e por sosode 'sin cu bo a ripara', nan ta yam'e Lifestyle Creep...It creeps up on you.
Ehempel:
Prome cu bo entradanan (salario) a subi bo tabata:
- Sali bai come 1 biaha pa luna.
- Pasa Starbucks 1 biaha pa siman
- Keda leu for di paña di marca
Awor cu bo salario mas halto bo ta:
- Sali bai come 2-3 biaha pa luna
- Pasa Starbucks cada pasa dia
- Cumpra paña di marca mas frecuente
Pues den transcurso di tempo e lifestyle cu bo tabata tin, a cambia y bira uno mas costoso. Por ta cu te asta e cosnan cu bo tabata considera un 'luho', awor ta cay den e categoria di 'necesidad'
No compronde nos robes si, bo tin tur derecho di uza bo placa extra pa haci locual cu bo ta desea. Pero si tur bo placa extra ta cubri bo gastonan nobo, con esaki ta yuda mehora bo situacion di finansas personal? Kizas un miho opcion ta pa busca un balansa entre un miho 'lifestyle' y crea rikesa pa bo mes den termino largo.
Con Mi Por Maneha Lifestyle Creep?
Traha Budget y Mantene Metanan Financiero
Asta si bo tin mas placa tur luna, keda na altura di cuanto entrada bo tin y con halto bo gastonan ta cu ayudo di un budget. Ademas di esaki, percura cu bo ta mantene bo metanan financiero (y ahusta nan tambe). Si bo kier un miho futuro financiero pa bo mes y bo famia, bo lo mester keda dedica tempo na esaki.
No Show Off
No laga un otro su decisionnan financiero afecta kico bo ta haci cu bo placa. Paso bo bisiña tin un auto nobo, no kiermen cu abo tambe mester di un. No cay den e trampa aki.
Kidou cu Debe
Extra placa pa luna por haci'e atractivo pa busca financiamento pa cualkier compra cu bo kier haci paso kizas bo ta pensa cu awor si bo por cubri e pagonan mensual pa tuma e financiamento. Pero si ta 'debe malo' of si e pagonan mensual ta haci cu bo no tin placa mas na final di luna, considera si ta un miho idea pa spaar pa haci e compra enbes di bai den debe.
Pero Kico Pa Haci Cu Mi Placa Extra?
Ta na cada persona pa dicidi kico nan ta haci cu nan placa, pero si nos por duna bo un conseho, nos lo bisa bo pa purba uza bo placa pa crea mas placa. Bo no mester ta un persona rico pa haci esaki.
Djis focus riba lo siguiente:
Enbes di cumpra productonan di cual nan balor ta baha, dedica un parti di bo placa pa inverti den algo di cual su balor lo subi!
