Debe Bon Vs. Debe Malo

Last modified date

"Good Debt Can Be A Powerful Tool, Bad Debt Can Kill You' - Robert Kiyosaki

Hopi biaha nos ta mira ‘debe’ den un sentido negativo, pero bo tabata sa cu ta posibel pa haci un distincion entre ‘Debe Bon' y ‘Debe Malo'? E por zona straño, pero sigui lesa y nos lo splicabo!


Considera lo siguiente:

Ora bo cumpra un producto, e balor di e producto den termino largo por subi, of e balor den termino largo por baha. E concepto aki lo yuda bo compronde e diferencia entre debe bon y debe malo. 

Por ehemplo:

A. Si bo cumpra un cas of tereno, e balor di e cas of tereno lo subi (appreciate) den termino largo.

B. Si bo cumpra un producto manera un computer, e balor di e computer lo baha (depreciate) den termino largo.


Ki Ora Mi Tin ‘Debe Bon’?

Si nos uza e ehempel cu nos a menciona prome, bo por bisa cu ‘Debe Bon’ ta yuda bo cumpra algo cual su balor lo subi den termino largo. Esaki ta nifica cu ‘Debe Bon’ por tin un efecto positivo riba bo finansas personal y bo balor financiero (net worth).


Ehempelnan di Debe Bon

Un Hypotheek
E construccion of compra di un cas nobo ta hopi costoso, y ta casi necesario pa bo sera un hypotheek pa por construi of cumpra e cas nobo. E hypotheek ta un debe, pero e debe aki ta fungi pa cumpra un 'producto' cual su balor lo subi den termino largo y asina mehora bo balor financiero tambe.

Debe di Estudio
E debe aki por ta un 'debe bon' den sentido cu bo ta uza e financiamento pa obtene un nivel mas halto di educacion. Den mayoria caso un nivel mas halto di educacion ta bai man den man cu un salario mas halto. Pues e 'bon debe' aki a yuda hisa bo mesun balor (bo abilidad pa gana un salario mas halto).

 

Importante: Tene na cuenta si cu ‘Debe Bon’ por cai den e categoria di ‘Debe Malo’ tambe. Kizas e pagonan mensual halto riba bo ‘Debe Bon’ ta negativamente afecta bo budget of te asta bo no por cumpli cu e pagonan mensual. Pa e motibo aki, evalua bon prome cu bo dicidi di uza financiamento pa cualkier producto of servicio.


Ki Ora Mi Tin Debe Malo?

Un bes mas nos por bai bek na e prome ehempel den e articulo aki y duna un bon definicion. Ora bo tin un debe cu no ta mehora bo balor financiero (net worth) of si bo a bai den debe pa cumpra un producto of servicio cual su balor ta baha den termino largo, bo por yama esaki un ‘Debe Malo’. Ademas, bo lo por considera debenan cu nivel di interes halto tambe manera ‘Debe Malo’.

Ehempelnan Di Debe Malo


'Fiansanan Personal'
Financiamento pa productonan of servicionan 'personal' manera un vakantie, muebles, electronica of paña por wordo considera 'debe malo' pa motibo cu:

1. E balor di e productonan aki ta baha den termino largo of den caso di un vakantie, e balor ta un 'experiencia'. Den un caso asina por ta un miho opcion pa spaar pa cumpra e productonan of servicionan aki.

2. Hopi biaha e interes cu bo mester paga riba debenan asina ta hopi halto.

Debe di Credit Card
Claro cu un Credit Card tin su ventahanan. E problema ta surgi ora bo no por paga e debe consistentemente. Ademas, hopi biaha un consumidor ta uza un Credit Card pa cumpra un producto di cual su balor lo baha. Finalmente, e interes cu bo mester paga riba debe di Credit Card ta relativamente halto tambe.


Con Mi Por Evita Debe Malo?

E siguiente 3 preguntanan di The Balance por yuda bo evalua si ta necesario pa bo uza financiamento pa cumpra un producto of servicio.

  • E placa cu mi lo fia pa haci un compra lo mantene su balor (of subi di balor) despues di 1 aña of despues di 5 aña?
  • Ta necesario pa mi haci e compra aki inmediatamente (un gasto inespera manera reparacion di auto)? Mi lo por warda y spaar pa e compra aki?
  • Tin un manera alternativo enbes di busca financiamento, pa paga pa e compra?

 

Share e articulo aki!
  •  
  •  
  •  
);