Bon Bini na parti 2 di ‘Con Pa Logra Bo Metanan Financiero’. Siman pasa den Parti 1, nos a toca e tema di ‘Balansa Interno’ huntu cu Jermin Bell di Bellance. Un ‘Balansa Interno’ ta e prome aspecto cu bo mester considera ora bo tin pensa di logra bo metanan financiero!
Awe nos lo trece pa dilanti e siguiente aspecto, cual ta Planeamento. Nos ta sigur cu bo tin e capacidad di planea caba, pero kizas cu un paar di extra tips, bo por logra haci’e mas eficiente pa asina yega na bo metanan financiero mas lihe!
Ora ta trata di bo finansas personal, bo lo mester por ‘play the long game’. Un cambio den bo situacion di finansas personal no ta pasa di dia pa anochi, pues bo lo mester por traha consistentemente y riba un termino largo pa bo por realmente mehora bo situacion financiero.
Pero con bo por traha un plan efectivo, eficiente y cu bo lo por sigui pa un termino largo? Lesa e siguiente 4 tips!
Importante: Gara un pen y un pida papel pa asina bo cuminsa brainstorm y planea bo metanan financiero pa 2019 despues cu bo lesa e tips!
Tip 1: Documenta Bo Metanan!
Prome cu tur cos, nos lo avisa bo pa tuma e tempo pa defini kico exactamente bo kier realiza
- Kico bo metanan financiero ta?
- Cuanto meta financiero bo tin?
- Dicon bo kier realiza e metanan aki?
Puntra bo mes e preguntanan aki y cualkier otro pregunta cu ta importante pa bo. Ora bo ta sinti cla, documenta e metanan aki riba un papel, poster of na bo manera preferi, pero sigura cu bo por wak e metanan constantemente!
Extra: Percura pa bo metanan ta S.M.A.R.T.
Tip 2: Con Bo Ta Yega Bo Metanan?
Tin un dicho cu ta bisa ‘It’s about the journey, not the destination’. Tuma e dicho aki como un ehempel y cuminsa pensa riba e pasonan cu bo lo mester tuma pa realmente yega na e metanan cu bo a defini despues di Tip #1. Cuanto tempo bo tin pa logra e diferente metanan financiero y cua accionnan bo mester tuma pa logra bo metanan? Documenta (skirbi) e pasonan pa cada meta financiero y tene cuenta tambe cu e tempo cu bo tin pa yega na bo metanan.
Importante: Si bo tin metanan grandi, kizas ta un bon idea pa parti nan den diferente meta mas chikito. Na e manera aki bo ta haci’e mas probabel cu bo por logra metanan grandi.
Tip 3: Haci Uzo di ‘Key Performance Indicators’
E ta zona manera algo cu un comerciante lo bisa, pero e ta sumamente importante. Simplemente bisa, un ‘Key Performance Indicator’ (KPI) ta un indicacion cu ta yuda bo midi si realmente bo ta na caminda pa logra un meta.
Ehempel di ‘KPI’: Si bo tin un meta pa spaar 1000 florin den 5 luna, bo mester spaar por lo menos 200 florin tur luna pa 5 luna largo. Den e caso aki, bo ‘Key Performance Indicator’ ta e placa cu bo ta spaar cada luna. Si e suma ta menos cu 200 florin pa luna, bo ‘performance’ ta malo y asina e ta bira mas dificil pa bo por logra bo meta. Documenta e 'KPI' pa cada un di bo metanan financiero.
Tip 4: Ta Honesto Cu Bo Mes!
Bo a documenta bo metanan financiero, e pasonan cu bo tin cu tuma pa yega na bo metanan y tambe e ‘key performance indicators’ cu lo guia bo y laga bo sa si bo ta na caminda pa logra bo metanan financiero. Basicamente bo tin un plan pa yega bo metanan! Facil of no?
Awo ta importante pa bo repasa kico bo a documenta despues di tip 1, 2 y 3.
- E ta zona realistico?
- Bo por mantene un plan asina den termino largo?
Ta honesto cu bo mes tocante bo capacidadnan y tambe realiza cu bo plan mester ta algo cu bo ‘kier’ haci y no solamente algo cu bo ‘mester’ haci. Si bo sinti cu bo 'kier' sigui e plan cu bo a caba di documenta, e lo bira hopi mas facil pa logra bo metanan financiero.
Awo cu bo a siña aspecto 1 (Parti 1) y 2 di 'Con Pa Logra Bo Metanan Financiero', bo falta solamente aspecto 3! Otro siman nos lo trece pa dilanti e aspecto final aki den Parti 3. Join nos Mailing List pa ricibi tur updates tocante nos articulonan!
