Probablemente bo lo relata e palabra ‘Net Worth’ na celebridadnan, doñonan di compania grandi of famianan cu tin hopi rikesa. Pero bo tabata sa cu e concepto di ‘Net Worth’ ta un bon tool pa yuda bo evalua e estado di bo finansas personal?
Pa yuda bo compronde dicon, nos a crea e articulo aki!
Kico ‘Net Worth’ Ta y Con Bo Por Calcula Esaki?
Ora bo mira e palabra ‘Net Worth’ pensa riba ‘Bo Balor Financiero’. Cu esaki nos no ta referi literalmente na e balor financiero di bo persona...Pero mas bien nos ta referi na e relacion entre bo pertenencianan (Assets) y bo debenan (Liabilities). Nos por splica e relacion aki cu e siguiente formula:
Assets: Medionan financiero, manera placa riba bo cuenta(nan) di spaar, pero tambe cosnan manera bo propiedadnan of bo pertenencianan cu tin balor.
Liabilities: Debenan.
Pues basicamente, bo 'Net Worth' ta mustra e diferencia entre e balor di bo pertencianan y e balor di bo debenan. Si e balor di bo pertenencianan ta mas halto cu e balor di bo debenan, bo 'Net Worth' ta un suma positivo. di otro banda, bo lo por tin un 'Net Worth' negativo tambe.
Ehemplo di calculacion:
"David tin 27 aña. Despues di a studia pa un temporada na Hulanda, ela bolbe Aruba bek y tin un trabou pa varios aña caba. Na e momento aki David ta huur un apartamento pero e ta desea di bira doño di su propio cas den futuro"
David su situacion financiero:
Assets:
-Un cuenta di spaar cu tin un saldo di 5 mil florin
-Un pida tereno cu tin un balor di 30 mil florin
-Un auto balora na 25 mil florin
Liabilities:
-Un debe di estudio di 60 mil florin
-Un Car Loan na balor di 20 mil florin
David su 'Net Worth' ta: -20 mil florin* (Assets - Liabilities)
*Por mira cu na e momento aki, David su 'Net Worth' ta un suma negativo. Esaki no ta necesariamento straño of malo, pa motibo cu David ta na e 'comienso' di su bida profesional y ta den e proceso di 'build up' e salud di su finansas personal.
Pero Pakico Bo 'Net Worth' Ta Importante?
'Net Worth' ta yuda bo persona mira realmente den cua direccion e 'salud' di bo finansas personal ta move. Corda cu bo 'Net Worth' ta un 'snapshot' di bo situacion financiero na e momento cu bo haci e calculacion. Pues, 'Net Worth' ta realmente bira un tool importante ora bo haci e calculacion continuamente (tur aña).
Si bo keda tuma decisionnan cu ta bon pa bo finansas personal, bo 'Net Worth' lo move den un direccion positivo y crece. Si e suma di bo 'Net Worth' ta baha continuamente, esaki por ta un señal cu bo finansas personal no ta saludabel!
Ademas di esaki, bo 'Net Worth' ta yuda bo compronde kico bo riesgonan ta tambe. Pa mira dicon, considera lo siguiente:
"Si bo perde bo trabou awe y keda sin entrada financiero, probablemente bo no lo por keda paga bo debenan. Si e situacion empeora asina hopi cu bo lo mester bende tur cos, e ganashi di benta lo por cubri tur bo debenan? Si e contesta ta no, por ta ora pa cuminsa mehora e situacion di bo finansas personal"
Kizas bo ta bai calcula bo ‘Net Worth’ y descubri cu e ta un suma negativo. Corda cu e idea no ta pa pone tur bo atencion riba e suma na e momento aki y perde cabes, pero enbes di esey:
- Tuma decisionnan cu ta crece e suma di bo 'Assets'
- Tuma decisionnan cu ta baha e suma di bo 'Liabilities'
- Track bo ‘Net Worth’ tur aña!
Si bo tuma e pasonan aki, bo por percura cu bo 'Net Worth' ta keda move den un direccion postivo!
Pa un idea di 'Average Net Worth Per Age Category', lesa e articulo informativo aki di Intuit (click pa lesa e articulo).
