Scenario: Bo Finanas Personal ta ricibi un 'hit' inespera..Kico bo ta haci?
No ta importa bo escohencia, e hecho ta cu hopi di nos a yega di experiencia un 'hit' inespera na nos finansas personal. Mayoria bes e ta un causante grandi di stress y malcontento, pero enbes di laga e casonan di emergencia inespera aki afecta bo mes y bo situacion financiero, percura pa bo tin un tipo di ‘cusinchi financiero’ prepara. E cusinchi financiero aki por existi den forma di un ‘Fondo di Emergencia’.
Kico ta un ‘Fondo di Emergencia’?
Simplemente bisa, un ‘fondo di emergencia’ ta placa cu bo ta pone un banda pa casonan di emergencia. E casonan aki ta inespera y ta dificil pa planea p’e y e fondo ta existi pa cubri e gastonan di bo ‘emergencia inespera’.
Dicon mi mester di un ‘Fondo di Emergencia?
Pa e mesun motibo cu bo ta segura bo bida of pertenencianan: ‘You Never Know’. Un fondo di emergencia ta percura pa tene bo situacion financiero stabiel, hasta den caso di un emergencia. E ta evita cu un gasto inespera ta resulta den (mas) debe, especialmente si bo persona lo mester uza un fiansa pa cubri e gastonan aki.
Ki ora algo ta un ‘Emergencia’?
Algo por sinti manera un emergencia, pero ta resulta cu e no ta. Pa yuda evalua si e ta un emergencia, puntra bo mes e siguiente 3 preguntanan:
1. E Gasto ta Inespera?
Si bo a planea adelanta, bo por a budget pa e gasto aki? Si enberdad bo no por a planea p’e, e gasto ta uno inespera.
2. E Gasto ta Necesario?
Pensa si e gasto ta realmente necesario y no djis un ‘kier’. Si bo dak di cas ta cuminsa lek durante awasero, e gasto di reparacion ta necesario. Al contrario, si e Iphone mas nobo a sali y bo kier e, pensa un biaha mas prome cu e bira un gasto y kizas e no ta un bon idea pa uza e placa di bo ‘fondo di emergencia’ pa cubri e gasto di e Iphone.
3. E Gasto ta Urgente?
E emergencia (gasto) mester wordo soluciona (paga) awo of e por warda? Kizas bo dishwasher a kibra pero bo por logra spaar pa un nobo dentro di paar di luna. Den un caso asina kizas e problema no ta urgente.
TIP: E reglanan aki ta subhetivo y ta keda na cada persona pa dicidi si algo ta un ‘emergencia’. Si enberdad bo mester uza e placa di bo ‘fondo di emergencia’, dal bai! Pero corda percura pa ‘yen’e’ bek despues cu bo a uza placa di e fondo aki.
Con Mi Ta Spaar P'e?
Realisa cu e proceso di yega na e suma ideal pa bo fondo di emergencia ta tuma su tempo (kizas mas cu 1-2 aña) . Sigura cu bo tin un plan di spaar realistico cu ta pas den bo budget.
Idea 1 Automatisa e Proceso di Spaar
si bo spaar AWG 20 pa siman, esaki ta AWG 1040 pa aña. Dentro di 3 aña bo tin AWG 3120! Si bo tin un transferencia automatico di AWG 20 pa bo cuenta di spaar cada siman, bo por yega bo meta sin esfuerso!
Idea 2 Organisa un 'Garage Sale'
Si bo tin pertenencianan cu bo no ta uza mas, bende nan y hinca e ganashi aki den bo fondo di emergencia. Enbes di un 'Garage Sale', bo lo por uza e grupo di Vraag & Aanbod riba Facebook.
Idea 3 Ahusta bo Budget
Bo tin gastonan dimas cu bo por evita? Si bo por baha e gastonan aki, e ta crea espacio pa spaar pa bo fondo di emergencia.
Idea 4 Bo a haña placa bek di belasting?
Si bo ta bai haña placa bek di belasting, bo por uza un porcion di e placa aki pa yena e fondo di emergencia.
Extra: Si bo tin hopi debe, buscando e balansa entre baha bo debe of spaar placa ta dificil. Percura pa bo evalua e importancia di cada un prome cu bo haci cambionan drastico na bo situacion financiero. Ademas, si bo ta bon segura contra eventonan inespera caba, kizas e seguro aki ta dunabo espacio pa baha bo debe enbes di spaar pa un ‘fondo di emergencia’.
Cuanto placa mi mester tin den mi ‘Fondo di Emergencia’?
- Si bo no tin un 'fondo di emergencia' ainda, bo por pone un meta pa spaar un suma cu ta similar na 1 luna di bo gastonan.Tip: Uza un budget pa evalua kico bo gastonan pa luna ta!
- Si bo ta sinti cu bo por spaar mas, expertonan ta recomenda pa spaar un suma cu ta similar na 3 of mas luna di bo gastonan.
|
|
