Dicon Fia Placa Ta Costa Placa?
Ora bo fia placa di un instancia financiero, semper tin un gasto extra cu bo mester paga cu ta yama interes. Di otro banda, ora bo deposita placa riba un cuenta di spaar na un instancia financiero, nan lo ‘paga’ bo un suma di interes riba e placa cu bo a deposita.
Bo por mira e suma di interes aki manera e ‘prijs’ di placa fia. Pero dicon e ‘prijs’ aki ta existi? Pa yuda bo compronde, nos a skirbi e articulo aki.
Un splicacion simplifica tocante e existencia di interes ta sigui abou. Pa un splicacion mas amplio, click aki
Tin dos motibo pa e existencia di interes:
Motibo 1: Incentiva
Placa ta valioso. Un instancia of persona cu ta duna un fiansa mester tin un tipo di ‘incentiva’ pa fia su placa na un persona of compania
Dicon?
1. E instancia of persona no por haci nada cu e placa tanten cu esun cu a fia e placa no a pag'e bek. Den otro palabra, oportunidadnan alternativo di inversion ta bai perd’i.
2. Semper tin e riesgo cu e instancia no ta haña su placa bek y (of) cu lo tin inflacion.
Motibo 2: ‘Time Value of Money’
E concepto financiero aki ta bisa cu ‘1 Florin Awe Semper Ta Mas Valioso Cu E Mesun 1 Florin Mañan’ (nos ta supone cu e posibilidad di gana interes ta existi). Pa bo por compronde e concepto aki miho, pensa riba e siguiente hecho:
Ta posibel pa ‘gana’ interes riba bo placa (p.e. via un cuenta di spaar)
Ehemplo di concepto 'Time Value of Money':
Pregunta:
- Bo tin dos opcion
Opcion 1: Ricibi Afl. 1000 awe
Opcion 2: Ricibi Afl. 1000 despues di un aña
Cua Opcion Bo Lo Scoge? (Kizas e ta obvio)
Contesta:
- Si bo ricibi e 1000 florin awe, bo lo por pone den un cuenta di spaar y ‘gana’ 1.5% interes riba e suma. Kiermen despues di un aña bo lo tin Afl. 1015.
Pues, e Afl. 1000 awe ta mas ‘valioso’ cu e Afl. 1000 ‘mayan’
Awo cu bo sa motibo A y B, bo por cuminsa compronde dicon un instancia of persona ta pidi pa ‘interes’. Un instancia financiero ta fia bo placa, tanten cu bo pag’e bek cu interes. Ademas, un instancia financiero tambe ta un negoshi, y mescos tur otro negoshi, e ta pone un prijs (den e caso aki interes) riba su producto. E interes aki ta exisiti di diferente componente.
Componentenan di Interes (NVB)
- Tarifa Basico di Interes
- Gastonan Operacional
- Tarifa di Riesgo
- Porcentahe di Ganashi
Pa un splicacion mas amplio (na hulandes) di e componentenan, click aki.
Dicon E Nivel Di Interes Pa Fiansanan Ta Varia?
Kizas awor bo ta puntra bo mes dicon e nivel di interes por varia asina hopi. Interes riba un fiansa di auto ta core den careda di 7%, di hypotheek ta 6-8%, fiansa personal ta 12-18% y interes riba un Credit Card por core den careda di 20%.
Manera nos a splica prome, interes ta wordo parti den diferente componente, y gran parti di e variacion den e nivel di interes ta ocasiona door di e componente di riesgo. Si bo a ripara, e nivel di interes ta hopi mas halto pa un fiansa personal of un fiansa di credit card compara cu e otro tipo di fiansanan.
E motibo ta cu e tipo di fiansanan aki ta carga hopi mas riesgo pa un institucion financiero. E porcentahe di clientenan cu no por (of no ta) paga e fiansanan aki bek ta hopi mas halto cu clientenan cu tin un fiansa di auto of fiansa di hypotheek. Ademas, un fiansa di auto of hypotheek tin e garantia tambe di e auto of e cas (si bo no paga bo debe, nan por tuma bo auto of cas den beslag).
Dicon E Nivel Di Interes Riba Un Cuenta di Spaar Ta Asina Abou?
Hopi di nos por corda antes ora e nivel di interes tabata muchu mas halto. Na mes momento e nivel di interes riba un hypotheek of fiansa di auto tambe tabata muchu mas halto. E splicacion pa e nivel di interes abou riba cuenta di spaar awendia ta un poco mas complica y tin di haber cu conceptonan di finansas y economia mas avansa, pero tin un bon video online cu por yudabo compronde.
Info Video: ECB = European Central Bank
