Spend Less, Eat More! Lesa e siguiente tips y cuminsa spaar placa riba bo compras.
#1: Shop na cas prome!
Prome cu bo bai haci compras, tuma nota di tur e productonan cu tin den bo cushina y cas ainda. Na e manera aki, bo por evita cumpra dobel of di mas di un producto. Na mes momento, e proceso aki ta yuda bo cuminsa pensa tocante e siguiente tip!
#2: Planea bo recetanan (Meal Planning)
Despues cu bo a mira ki producto bo tin na cas caba, gara un pen y un pida papel (si bo kier ta mas organisa, uza un schrift bashi) y cuminsa brainstorm! Kico bo lo por cushina cu e productonan cu bo tin na cas caba?
Extra: si bo mester di inspiracion pa recetanan, puntra un persona cu por cushina bon! Ademas, puntra bo amigonan of sernan keri, kico nan lo kier come durante siman. Click aki pa mas inspiracion pa recetanan facil, simpel y barata!
E concepto di ‘Meal Planning’ tambe ta un bon manera pa spaar placa ora di haci compras. Door cu bo ta na altura di tur locual cu bo lo mester cumpra pa e siman of luna cu ta bin, bo por haci hopi di bo compras den un solo shot y tambe evita cumpra cos di mas! Mas importante, bo por cumpra cosnan den ‘bulk’ y den ‘sale’ tambe.
#3: Traha un lista di bo compras adelanta
Nos gusta pensa cu nos por corda tur cos, pero cuanto biaha bo ta lubida di cumpra net un cos importante na supermercado? Pa e motibo aki, yuda bo mes y skirbi tur e ingredientenan of productonan cu bo tin mester riba un pida papel, den bo smartphone, of den e schrift handig cu nos a menciona mas prome. Corda cumpra solamente e productonan cu bo tin mester y evita di cumpra cosnan cu no ta riba bo lista. Asina ki bo por haci compras eficiente, lihe y na un manera cu ta spaar bo placa!
#4: Haci compras mas serca di cas
Hopi biaha bo por cumpra mayoria producto cu bo mester na cualkier supermercado. Evita di uza gasoline valioso y purba shop mas serca di bo cas. Claro cu bo lo mester evalua e prijsnan di cada supermercado, pero si bo kier spaar gasoline y tempo, buska un supermercado cu bo por confia y cu tin prijs rasonabel, serca di bo cas.
#5: Haci uso di un ‘loyalty card’
Cierto supermercado tin e programa di ‘bonus card’ of ‘rewards cards’. Haci bon uzo di esaki paso e puntonan cu bo ta spaar por wordo converti den ‘rewards’ of descuento special! Ademas, un supermercado manera PriceSmart tin un Membership program cu ta haci posibel pa haci compras na PriceSmart. E ventaha di esaki ta cu PriceSmart ta ofrece hopi producto den ‘Bulk’ (den cantidad grandi). Si bo cumpra na cantidad grandi, e prijs averahe ta baha y bo ta spaar placa!
#6: Shop Specials
Supermercado manera Super Food ta pone nan specials online! Corda check e specials nan online prome cu bo bishita na e supermercado, pa asina spaar placa ora di haci bo compras!
#7: Freezer over Fresh
Berdura den freezer por sali mas barata cu berdura ‘fresco’ y bo tabata sa cu berdura (y fruta) paketa den freezer hopi biaha tin mas vitamina y nutriente cu berdura ‘fresco’? E motibo ta cu berdura ‘fresco’ ta cuminsa perde nutriente y vitamina for di momento cu e wordo saka for di un plantacion. Door cu na Aruba nos ta importa hopi berdura y fruta, e productonan por tin dianan of simannan na caminda caba. Al contrario, berdura (y fruta) den freezer ta mantene nan nutriente y vitaminanan. Pues tin biaha ta mas ventahoso pa cumpra berdura (y fruta) paketa den freezer. Ademas, e smaak ta hopi bon y no ta varia muchu for berdura fresco.
#8: Cumpra un marca 'generico'
Hopi biaha bo por spaar placa door di cumpra un producto di un marca 'generico' (menos conoci). Nos ta pensa cu e lo por ta di menos calidad (cu tin biaha ta berdad) pero mayoria di biaha, e ta e mesun calidad cu esun di e marca conoci. Un marca conoci automaticamente tin prijs mas halto door di su ‘status’ como producto famoso.
Extra: Productonan generico y cu prijs mas rasonabel ta poni mas ariba of mas abou den e rekinan di supermercado. E productonan di marca conoci ta poni na nivel di pecho pa cabes (pa bo wak e dibiaha).
#9: Traha un budget pa bo compras
Si bo no sa con pa traha un budget, click aki. Si bo ta conoci cu e manera di budget, purba budget un cantidad maximo di placa cu bo ta bai dedica na ingredientenan of productonan. E budget por ta pa siman of pa luna, asina ki bo por spaar placa y evita gasta di mas riba bo compras.
#10: Haci compras 1 biaha pa siman
Manera menciona prome, si bo sigui e tips nan, bo lo por haci mayoria di bo compras den un solo shot! Asina bo ta evita di bishita supermercado mas biaha. Mas bo bishita, mas chance bo tin di cumpra cos nan di mas of cos nan cu bo no mester.
#Finalmente: Come prome cu bo haci compras
Bo sa e sintimento ora bo cana drenta un supermercado barica bashi? Diripiente tur cos ta mustra dushi y bo ta cumpra mas cu bo mester. Pa e motibo aki, come adelanta. Asina ki, bo por drenta un supermercado sin e stem den bo cabes cu ta purba convencebo pa cumpra e cos nan cu bo no mester!
|
|
