E uzo di financiamento por ta un bon tool pa yuda bo logra metanan manera construccion di bo propio cas of e compra di un auto. Pero e accumulacion di debe por seriamente afecta bo situacion financiero.
Pa duna bo un idea si bo tin muchu debe, considera e siguiente 5 señalnan indicativo!
#1: Bo No Sa Cuanto E Suma Di Bo Debe Total Ta
E por ta ‘normal’ cu bo no ta pone e atencion necesario na bo finansas personal. Pero e echo cu bo no ta na altura di bo situacion financiero por ta un indicacion cu bo no kier confronta e ‘berdad’ tocante bo decisionnan financiero. Kisas bo a tuma decisionnan cu a hisa e nivel di bo debe na un punto cu bo no por domin’e mas.
#2: Bo No Por Spaar
Continuamente haciendo uzo di bo placa di spaar pa cubri gastonan ‘inespera’ of e inabilidad pa spaar placa tur luna ta un ‘red flag’. Mayoria bes esaki ta un indicacion cu bo mester evalua bo budget y bo gastonan mensual. Si bo budget ta indica cu bo obligaccionnan bancario ta come mayoria di e placa disponibel tur luna, bo por tin muchu debe.
#3: Bo Tin Dificultad Pa Cumpli Cu Bo Obligacionnan (e.o. na banco)
Si bo ta confronta bo mes cu e inabilidad pa haci e pagonan (minimo) riba bo obligacionnan bancario of si mayoria bes bo haci bo pagonan laat, esaki ta un indicacion cu bo no tin suficiente entrada pa por cubri bo gastonan. Mas aleu, pagonan laat por negativamente afecta bo 'historia di pago', cual por limita bo abilidad di ricibi un prestamo for di instancianan financiero.
#4: Bo Ta Crea Debe Pa Paga Otro Debe
Si presta placa ta bo solucion pa cumpli cu bo pagonan di debe, kisas bo tin un problema cu e nivel di debe cu bo tin. E metodo aki ta ofrece bo e espacio pa cumpli cu bo pagonan den termino cortico, pero na final di dia, bo a crea un debe nobo cu tambe mester wordo paga. E debe nobo aki por tin un nivel di interes mas halto y trece mas gasto tambe.
#5: Bo Tin Un ‘Debt-to-Income Ratio’ Halto
Maske cu e calculacion di bo debt-to-income ratio (DTI Ratio) no ta dunabo un ‘full picture’ di e salud di bo finansas personal, e por ta un bon tool pa mira si bo tin muchu debe. E ‘ratio’ aki ta mira kico e relacion ta entre bo debe y entrada via e siguiente formula:
(Total Monthly Loan Payments / Gross Monthly Income) x 100% = Debt-To-Income Ratio
Pa un idea di kico un bon DTI ratio ta, considera e siguiente categorisacion door di expertonan manera Wells Fargo.
Debt-to-Income Ratio Levels
- 35% of menos: Compara cu bo entrada, bo tin un nivel di debe manehabel
- 36% pa 49%: Tin espacio pa baha bo debe y mehora bo ‘DTI Ratio’
- 50% of mas : Bo tin muchu debe y ta ora pa tuma accion!
Extra: Calcula Bo 'Balor Total'
Un otro manera pa mira cuanto debe bo tin, ta pa calcula bo 'Balor Total'. Pa mas informacion tocante bo 'Balor Total', click aki pa lesa nos articulo tocante e topico.
Mi Tin Muchu Debe, Kico Pa Haci?
Si bo ta reconoce e señalnan aki y bo ta sinti cu bo tin muchu debe, ta bon pa considera e siguiente pasonan (cu links pa diferente articulo riba nos website):
- Visualisa Y Compronde Bo Situacion Financiero
-Con Pa Traha Un Budget
-Con Pa Calcula Bo 'Net Worth' - Priorisa Obligacionnan Y Crea Un Strategia Pa Paga Debe
-2 Strategia Pa Paga Bo Debe - Ahusta bo 'Lifestyle'
-Kico 'Lifestyle Creep' Ta?
Bo ta gusta lesa nos articulonan? Yuda nos mehora door di yena nos encuesta cortico! Pa yen'e, click aki
