2 Strategia Pa Paga Bo Debe Mas Lihe

Aviso: Consulta bo Banco of Dunador di Credito, si ta posibel pa paga bo debe mas lihe cu e termino palabra #ConocementoTaPoder

Debe financiero ta casi inevitabel. Si por ehempel bo kier cumpra un auto nobo, muebles nobo, traha un cas of bai studia, probablemente bo lo haña bo mes den un situacion unda cu bo mester fia placa na un banco of un dunador di credito. E placa fia aki ta varia di suma, nivel di interes, termino di pago y tambe den e cantidad di stress cu e ta causa bo. Pa e motibo aki ta importante pa bo siña un metodo con pa sanea bo debenan mas lihe posibel.

Varios metodo ta existi, pero den e articulo aki nos lo focus riba dos cu ta facil pa implementa:

Metodo 1:   Debt Snowball
Metodo 2:   High Interest Rate  

Prome cu nos cuminsa splica e metodonan, ta importante pa bo considera 2 aspecto importante, cual ta bo Pago Minimo Total y bo Pago Maximo Total.

Pago Minimo Total: Esaki ta tur e pagonan minimo obligatorio pa luna riba riba bo debenan. Evita mas tanto posibel pa paga menos cu e suma minimo obligatorio, ya cu esaki lo trece cune mas gasto di interes, boet y alavez esaki por afecta bo historia di pago/credito negativamente.

Pago Maximo Total: Esaki ta e suma maximo cu bo ta pone disponibel segun bo budget pa paga bo debenan.

Pago Minimo Total
Placa Extra               +
Pago Maximo Total 

Manera e formula ta mustra, e Pago Maximo Total ta consisti di bo Pago Minimo Total plus Placa Extra. Idealmente, e Placa Extra aki ta inclui cada florin cu bo ta resta despues di paga bo compromisonan financiero y otro necesidadnan manera Awa, Coriente, Seguro etc. Mas halto e suma di bo Placa Extra ta, mas lihe bo por paga bo debenan na un manera acelera!

Metodo 1: Debt Snowball

E idea tras di e metodo aki ta pa baha bo debe mas lihe posibel door di uza e Placa Extra pa kita e debenan mas chikito prome, hasta si esey kiermen cu bo ta bai paga mas na interes den termino largo. E stapnan pa utiliza e metodo di Snowball ta lo siguiente:

1. Determina bo Pago Maximo Total.
2. Haci e Pago Minimo riba tur bo debenan.
3. Utiliza e Placa Extra (Pago Maximo Total - Pago Minimo Total), pa paga extra riba bo debe cu e balansa mas abou.
4. Ripiti e proceso aki cada biaha cu bo caba di paga e debe cu e balansa mas abou!

Metodo 2: High Interest Rate

E meta kinan, ta pa evita paga interes dimas riba bo debenan door di uza e Placa Extra pa kita debenan cu nivel di interes mas halto prome. Esaki kiermen cu si bo utiliza e metodo aki,  al largo plazo, bo lo spaar mas placa compara cu e metodo di Debt Snowball. E stapnan pa utiliza e metodo di High Interest Rate ta lo siguiente:

1. Determina bo Pago Maximo Total.
2. Haci e Pago Minimo riba tur bo debenan.
3. Utiliza e Placa Extra  (Pago Maximo Total - Pago Minimo Total), pa paga extra riba bo debe cu e nivel di interes mas halto.
4. Ripiti e proceso aki cada biaha cu bo caba di paga e debe cu e interes mas halto!

Ehempel

Ban considera un situacion similar na loke hopi hende ta experiencia den nan bida: Un persona cu tin diferente debe cu diferente nivel di interes.

Den e situacion aki nos tin un Pago Minimo Total di AWG 1000. Si no tabata tin niun pago di interes, un persona lo por paga tur debe prome cu november 2022 (4 aña y 2 luna) . Pero den bida real, bo mester paga interes. PUES, den bida real un persona lo por paga e debenan aki prome cu mei 2023 (4 aña y 8 luna) cu un suma di interes total di AWG 5924.79

Pa completa e ehempel aki, ban asumi cu bo Pago Maximo Total ta AWG 1200 pa luna

Pago Minimo Total  AWG 1000
Placa Extra               AWG 200 +
                                        AWG 1200

• Si bo uza e metodo di Debt Snowball, e lo tuma bo 3 aña y 7 luna pa paga bo debe y finalmente bo lo paga AWG 4555.01 na interes.
• E metodo di High Interest Rate tambe lo tuma bo 3 aña y 7 luna pa paga bo debe, pero na final bo lo a paga AWG 4480.19 na interes.

Un ehempel interesante, paso e metodonan tin basicamente e mesun resultado. Na final, e metodo di High Interest Rate ta mas optimal paso bo ta spaar AWG 74.82 na interes. Si bo ta desea di visualiza bo debenan, un online tool manera Unbury.us por yudabo wak realmente con largo bo debe lo keda cu bo. 

Cua Metodo Ta Miho Pa Bo?

Pa un persona 100% racional, e metodo di High Interest Rate ta miho paso bo ta logra spaar mas placa den transcurso di tempo. Pero hopi biaha bo mester di un bon 'Push' ora di paga debe. Akinan e metodo di Debt Snowball tin su ventahanan valioso:

1. E metodo di Debt Snowball ta pone bo sinti 'bon': Kinan bo ta logra kita e prome debe mas lihe, y asina bo ta haña un 'Push' mas lihe, cual por motiva bo pa sigui paga e resto di bo debenan.
2. E metodo di Debt Snowball por hisa e suma di bo ‘Placa Extra' mas lihe: Cada biaha bo elimina un 'Pago Minimo' di un debe, e ta reduci bo 'Pago Minimo Total'. Pues si bo tin scarcedad di sen cada luna paso bo budget ta 'tight', esaki ta ofrecebo un tiki extra 'breathing room'. Asina bo tin mas placa 'extra' cada biaha cu bo caba di paga un debe (E hecho cu bo ta paga mas na interes na final, no ta afecta bo placa extra (e ta djis afecta e suma total cu bo ta paga na final)
   

Na final di dia no ta importa cua di e dos metodonan bo uza, paso tur dos ta yudabo baha bo debe na un manera structura! #CarteraYenCurasonContento